Urukiiko rwisumbuye rwa Muhanga rwakatiye Nyirabizimana Immaculee ushinjwa kuroga umwana we akoresheje kiyoda, imyaka 25 y’igifungo, nyuma yo kwemeza ko rufite raporo ya muganga yemeza ko umwana yarozwe hakoreshejwe Kiyoda. Isomwa ry’uru rubanza ryabaye mu ruhame mu Mudugudu wa Munini, Akagari ka Jenda, Umurenge wa Mugina mu Karere ka Kamonyi.
Ubushinjacyaha bwari bwasabiye Nyirabizimana Immaculee igihano cya burundu, ariko Urukiko Rwisumbuye rwa Muhanga rwavuze ko igihano ubushinjacyaha bwari bwamusabiye gifite ishingiro, ariko butakigenderaho kuko Nyirabizimana akemera akanagisabira imbabazi. Ikindi ni uko ari ubwa mbere akoze icyaha kandi akaba yarabyaye ari muto bimugabanyiriza ibihano.
Yaramba Athanase Perezida w’Urukiko rwisumbuye rwa Muhanga yavuze ko bikwiye kubera isomo n’abandi batekereza kwica no gukora ibindi byaha. Rwemeje kandi ko iki cyaha ari icy’uburozi hakoreshejwe Kiyoda.
Minani Aroni wabanaga na Nyirabizimana Immaculee mu buryo butemewe yatangaje ko impanga y’uyu mwana warokotse uburozi yasanze yapfuye atazi icyamwishe kuko yasize ari muzima.
Ubwanditsi
